自願醫保｜朋友搵你買保險 係咪要即時「block」佢？

Yahoo財經更新時間2026年3月4日週三 上午7:29 [GMT+8]

聽朋友介紹保險，如果想搵一個起步點，反而自願醫保是一個好選擇。·Farknot_Architect via Getty Images

有一類約會大家總有機會遇到，就係朋友或舊同學約你傾保險，遇上這類邀請究竟可以點應對？

美股外幣即時報價 多國新聞任睇

調整心態兼做功課 選擇自願醫保作為傾談起點

如果係多年不見的舊同學，忽然text你邀約傾保險，當然可以選擇已讀不回。對方不識趣一再追問幾時得閒，可乾脆即「block」一了百了。

但遇上稍有交情的朋友就較難推卻邀請，大家則可能會抱著兩種心態赴約，一是認定對方只係想sell單唔係想幫你；二係唔想得失朋友硬著頭皮都要幫對方。兩種心態都會阻礙自己客觀地作出投保決定，前者係主觀否定保險代理的價值，包括以其專業知識幫你了解保險產品，還有往後的支援服務。後者係純粹為友情買保險，就較容易買著自己未有急切需要的保險，白白浪費寶貴的供款。

要甩走這兩種心態，你收到做保險朋友邀約時，先要評估一下這名朋友的為人，對方可靠有交帶當然值得出席，否則最好都係找藉口推掉。赴約時亦不妨以初步了解保險產品的心態與朋友交流，幫朋友跑數是其次，最重要係選擇適合自己的保險產品。

聽朋友介紹保險，最熱門的產品離不開人壽保或危疾保，甚至有儲蓄成份的人壽保。如果想搵一個起步點，反而自願醫保是一個好選擇。

自願醫保受政府醫管，保險公司提供的自願醫保，須符合當局訂立的最低要求，包括條款細則、保障範圍及保額，均需經醫務衞生局審核認可。自願醫保另一優勢是容易做功課，自願醫保產品在網站都會提供保障範圍、產品特色介紹，更重要是自願醫保規定須公布年齡分級的保費表，比對產品時更容易「格價」。

自願醫保除了可以扣稅，另一特色是越年輕買保費越平。例如靈活計劃，35歲投保人月費僅1,123.7元，「墊底費」每月平至324.7元。部分自願醫保產品更會提供無索償折扣，例如連續5個或以上保單年度未有索償，折扣可高達15%。

自願醫保的保障範圍，除了留院開支，更包括日間醫療中心進行的外科手術如內窺鏡。至於自願醫保靈活計劃，保障範圍更擴大至出院後物理治療、家中看護費、日症病人洗腎及精神科治療等，令受保人享有更全面的醫療保障。

如果擔憂自己意志力未夠堅定，可考慮反建議朋友以視像會議方式傾保險，減少面對面向朋友表示要再考慮是否幫襯佢買保險的尷尬。·sinology via Getty Images

做保險的朋友，當然只會sell自己公司的自願醫保，甚至會借勢推銷更高階的醫保產品。所以應該先聽朋友的介紹先作為參考，之後再比對其他自願醫保計劃再作決定。如果擔憂自己意志力未夠堅定，可考慮善用科技，以自己事忙為由，反建議朋友以視像會議方式傾保險，減少面對面向朋友表示要再三考慮的尷尬。

縮沙最後防線：冷靜期

即使做足功課，最終決定幫朋友買自願醫保，都有可能之前睇漏眼，再發現有更吸引的自願醫保計劃。幸好還有一道縮沙最後防線，就係冷靜期。

現時保險業監管規定，保險公司將保單交付保單持有人後，或向保單持有人發出保單通知書後起計21天為冷靜期。假如未曾提出索償，您有權在冷靜期 (至少21日)内，取消保單並全數取回已付保費。

決定縮沙的話，最好直接找保險公司的客服代表處理，或親身到保險公司客服中心辦理，既可以避免搵朋友取消保單的尷尬，以及朋友採取拖字訣令你錯失在冷靜期縮沙的機會。