大師冇點你│強積金「對沖」安排取消 會否引起裁員潮？
強積金「對沖」機制，今年5月1日開始，正式玩完。·@ Didier Marti via Getty Images
今年5月開始，萬惡嘅強積金「對沖」安排會取消，你準備好未？又怕唔怕4月畀人炒？
美股外幣即時報價 多國新聞任睇
強積金「對沖」機制年5月1日正式玩完
上星期專欄寫過強積金機制打算提高收入上下限，反應相當好，果然係天怒人怨。不過埃汾（正係本人）建議大家睇開啲——強積金嘅精髓唔係「積金」，係「強」，係冇得唔供的。除非你唔返工，或者移民（但外國一樣有類似嘅東西），否則就必然要玩。而當然唔好諗住用啲非法途徑提取強積金，肯定搏唔過。
既然強積金係「強」，你鬧都冇用，只能在機制入面盡做，減低傷害。認識多啲，總係好。
強積金收入上下限提高，仲未落實，至少都等到2026年。但有一樣關於強積金嘅安排，今年5月1日就會落實。就係萬惡嘅強積金「對沖」機制，今年5月1日開始，正式玩完。
強積金「對沖」機制，個中文名夠晒誤導，英文係offset，中文叫「對沖」唔多妥。未畀人炒過魷魚嘅你，可能唔知咩係「對沖」，但埃汾畀人炒過，同你解釋下。
首先，有啲人唔知，強積金供款有兩部份。除咗每個月在你份糧度扣嘅「僱員供款」，亦都有你睇唔到嘅「僱主供款」。例如高收入（月入超過3萬）嘅打工仔，而家每個月畀人扣起1500蚊供強積金，但你老細亦每個月幫你供1500，都係入咗你強積金戶口，理論上都係歸你所有。
而即使未畀人炒過，可能都聽過「遣散費／長期服務金」。詳情唔多講，自己Google，但你做得夠耐而畀人炒（冇重大過失之下），係有錢賠嘅。金額同你人工以及年資有關，計你月入嘅3份之2，再乘返你年資。不過亦係有上限，上限25,000。換句話講，即使你月薪10萬，做咗9年，你都只係拎 25,000 X 9 X 2/3，即係15萬（而唔係 100,000 X 9 X 2/3 = 60萬）
畀人炒，有舊錢賠，相當好丫，除咗感覺有些少尊重咁大把，亦都有啲錢，畀你被裁後應下急。
但唔少人冇留意，呢舊錢，係羊毛出自羊身上——你以為係老細賠多一筆，錯。唔好意思，因為有「對沖」機制，所以實際上係用你自己嘅錢賠返畀你。即係點？上面咪講過有「僱主供款」——你嘅「遣散費／長期服務金」，就係在呢度拎出嚟畀你，你自己嘅錢嚟的，變相提早拎咗少少強積金。而僱主，分分鐘一個仙都唔洗出！（如果你舊「僱主供款」夠冚的話——唔夠就當然僱主要自己出）
因為有「對沖」機制，所以實際上係用你自己嘅錢賠返畀你。·mathisworks via Getty Images
你畀人炒拎咗舊錢，但其實你嘅強積金戶口就少咗舊錢，絕對影響你退休，而僱主可能一個仙都唔使出。有冇搞錯？咁都得？明明我俾人炒，但唔係老細畀舊錢我，係用我自己嘅錢畀自己？係，係十分離譜。
但點解會有呢樣東西？尋根究底，係因為上世紀七八十年代，引入「遣散費同長期服務金」嗰時決定嘅。當年當然未有強積金，但部份機構有「公積金」，當年就容許有「對沖」。
問題係，以前未有強積金，影響嘅人好少。但後來有咗強積金，就差不多人人都受影響。「對沖」機制，係最初推出強積金制度時，政府希望僱主支持，而做嘅讓步。
政府宣傳 裁員未必有着數
咁但，「對沖」呢啲咁荒謬嘅東西，已經係廿幾年前嘅事。2000年強積金制度推出後，已經不停有人鬧「對沖」，卒之拖到2025年先取消呢個安排。好多人未必鍾意前特首梁振英，但你可以話，係因為佢2012年選特首時開始提出呢樣嘢，後人跟進，先令今日會取消「對沖」。
取消強積金「對沖」，對打工仔好似幾好，對僱主就唔多好。以前炒人唔使自己拎錢，以後就要。
咁會有乜後果？好多人就擔心，無良嘅僱主，會在5月1日前，仲有得「對沖」嘅日子，就炒咗啲員工，可以「對沖」。然後先請返佢哋。
不過近日政府已經開始周圍吹風同宣傳，話畀僱主聽，咁樣係冇着數嘅。留意 只要畀足錢，炒人唔犯法，僱主亦唔會理政府「勸喻」。要僱主唔諗5月1日前炒人，就唯有話畀佢哋知，根本冇着數。
點解冇着數？政府都做咗唔少例子去計畀僱主睇。都幾複雜，我有啲懷疑僱主都未必睇得明，大家有興趣可以去睇。
不過當中嘅精髓，係「取消對沖」，冇追溯力。即係話，5月1 日前嘅僱主供款，一樣可以拎嚟「對沖」（所以打工仔唔好太開心住），只係5月1日之後嘅僱主供款，就冇得對沖了。
根據政府嘅計法，僱主5月1日前炒人然後又請返，絕對冇着數。·RUNSTUDIO via Getty Images
在咁嘅安排下，根據政府嘅計法，僱主5月1日前炒人然後又請返，絕對冇着數。皆因即使僱主唔炒人，一路留住個員工，之後先炒佢，但以前積落啲僱主供款一樣可以拎嚟「對沖」。但如果5月1日前炒人，固然呢刻可以對沖，但5月1號先請返佢，由嗰時開始，啲供款一樣全部冇得「對沖」，要僱主自己出 ——所以「轉制前炒人，之後請返」，應該係冇着數嘅。你在5月1日前炒個舊人，5月1日後請返個新人，情況亦係一樣。
不過似乎政府冇講到一樣嘢：如果僱主索性5月1日前炒人，然後唔再請返，咁咪慳到最盡囉。事實似乎係咁，不過留意僱主從來唔係開善堂，雖然個個話經濟好差，但你見失業率低，好多行業，特別係飲食業服務業前線，仲係請唔到人。往往係僱員惡過僱主，僱主驚員工炒佢魷魚多啲。
所以相信，5月1日前大量僱主裁員呢個猜想，應該唔會出現……啩。
李聲揚
前大行分析員，如今無業遊民，別人恐懼時我貪婪
